දේන කුසුමාවතී - 3 වන කොටස

විශේෂාංග කවි පිටුව කතා පිටුව දේශපාලන වෙළඳ දැන්වීම් රේඩියෝව
දෝන කුසුමාවතී - 3 වන කොටස

විල්සන්ලගෙ ගෙදර පිහිටා තිබුණෙ මොරටුවේ, ගාලු පාර අයිනෙමයි. ඒක කුලී ගෙයක්. කාමර දෙකයි , සාලෙයි, කුස්සියයි. වැසිකිළිය තිබුණේ ගෙට යාර විසි පහක් විතර ඈතින්. නෑමට එතරම් ගැඹුර නැති ළිඳකුත් තිබුණා.

සුරුට්ටු ගඳ හැම තැනම. විල්සන්ගෙ තාත්තා සුරුට්ටු බිව්වේ. විල්සන් නම් සමහර විට සිගරට් බොනව ඇති. එයාට සුරුට්ටු උරන්න දෙන්න නරකයි. එතකොට නාකියි වගේ. කටත් ගඳ ගහනව.

ලයනල් දවසක් සිගරට් එකක් බීල කුසුමාවතීගේ මූණට දුම් වලලු යැව්වා. “ඒයි.. යා.. එප්…පා අයියෝ..”
කුසුමාවතී ජීවිතේටම බයිස්කෝප් දෙකයි බලල තිබුනේ. එකක් තමා පන්සලේ බණ මඩුවෙ පෙන්නාපු බරව බයිස්කෝප් එක. අනික පාතාල භෛරවී.. දෙමළ එකක්. ගමේ කවුරුවත් දකී කියල දෙන්න දෙපැත්තෙන් ගිහින් නුවර වෙම්බ්ලි සිනමාහලේ බැල්කනියෙ ඉඳන් බැලුවේ.
ලයනල් එයාගෙ සීට් එකේ පාත් වෙලා කුසුමාවතිගේ උරහිසට මූණ ඔබා ගෙන මොනවද කියෙව්ව. රාම් රාඔ ගෙයි මාලතීගෙයි රංගනයට වශී වෙලා හිටි කුසුමාවතිට ලයනල් කී දේවල් ඇහුණෙ අතරින් පතර.
” මම විබාගෙ ඉවර වෙච්චි ගමන්ම රස්සාවක් හොයා ගන්න බලනව. මට ලංගමේට ගියෑකි. නුගවෙල ඩිපෝවෙ ලොක්කෙක් ඉන්නවා මගෙ දුර නෑයෙක්. අපි පැනල යමු. ගිහින් කසාද බඳිමු. ටික කලක් යනකොට අම්මලා කැමති වෙයි.”
බයිස්කෝප් එක ඉවර වෙනතුරු ලයනල් , කුසුමාවතිගේ අත මිරිකගෙන හිටියේ.

” නෝනෙට හොඳටම නින්ද ගිහින් තිබුණා. ගමන් මහන්සියට වෙන්ටෑ. මං ආයෙ මොකටද කියල කීද්දුවෙ නෑ”
විල්සන් රත්තරං දත පේන විදියට හිනා වෙලා කුසුමාවතිගෙ අතින් ඇල්ලුවා. ඊට පස්සෙ චිමිනි ලාම්පුව නිවා දැම්මා. පියවතී නැන්ද අඳින්න කියපු සිලික් ගවුම දැන්ම අඳිනවද ? නැද්ද ? කුසුමාවතී හිතුව.
මහ වෙලාවක් ගියේ නෑ. ගම හරහා දුවල ආව වගේ හති දැම්ම විල්සන් අනෙක් ඇලයට හැරිලා නිදා ගත්තා.

ඇයි දන්නෙ නැහැ එයාට එහෙම උනේ. එයා මගෙ අතින් ඇල්ලුවෙත් බයෙන් බයෙන් වගේ. හරියට මං එපා කියයි කියල වගේ.
එදා බාලන් ඔය ගාවදි තමන්ට බලාත්කාරෙන් කල දේ මීට වඩා කොච්චර සනීපද කියල හිතුන. බාලන්ගෙ හැඩි දැඩි බාහු වලට මිරිකී චප්ප උනු කුසුමාවතීට බයක් දැනුනේ නෑ. ඒක අමුතු මිහිරියාවක්. උණුහුමක්. හොඳ වෙලාවට අහල පහල කවුරුවත් හිටියේ නැහැ. කවුරු හරි බලා ගෙන හිටියා නම් වඩාත් හොඳයි කියල කුසුමාවතීට හිතුනා.
ගමේ ගියාම මං යනව බාලන් බලන්න. මං තරහ නෑ කියලත් කියනව.

කුසුමාවතියි , විල්සනුයි උදෙන්ම නා ගන්න ළිඳට ගියා. ළිඳ එච්චරම ගැඹුරු නෑ. විල්සන් වතුර බාල්දි හත අටක් ඇදල දුන්න. තවම අළුත් මනමාලිනේ කියල.

විල්සනුයි අම්මයි මොනවද කුටු කුටු ගෑව. ඒ මොනවද කියල ඇහුනේ නැහැ.

” උඹ අර පිරුවටේ අරන් තිබ්බද ?”
” ඒක පාවිච්චි කළේ නැහැ අම්මේ”
” උඹ මොනවත් දැක්කද ?”
” ඔව්.. එයාගෙ ගවුමේ. අර උදෙන්ම හෝදල දැම්මේ අප්පිරියයි කියල”
” දැන් ඒකිගෙ ඔළු ගෙඩියද පෙන්නන්නෙ අර මහ ගෑණිට?”
” මම ඕව එච්චර ගණන් ගන්නෙ නෑ”
” ගිහි ජීවිතේට ආවා නම් ගිහියෙක් වගේ හිතන්න කරන්න වෙනව”

” අම්මේ.. විල්සන් අයිය මොන වගේ රස්සාවක්ද කරන්නේ… ?
” ඒක ලොකු කන්තෝරුවක්.. අපේ පුතා තමා දවල්ට ඒක බලා ගන්නෙ. රෑට වෙන කෙනෙක් ඉන්නවා. දැක්කද අර යතුරු කැරැල්ලෙ ලොකු. අපේ පුතාගෙ බාරෙ තමයි වටින කියන දේවල් සේරම තියෙන්නේ”

විල්සන් සේවය කළ කන්තෝරුව පිහිටා තිබුනේ රත්මලානේ. වැඩට ගියේ බයිසිකලේ. එක දවසක් විල්සන් වැඩ ඇරිල එන වෙලාව අල්ලල කුසුමාවතී ගාලු පාර අයිනෙන් ඇවිද ගෙන ගියා.

” අම්මට සිරි.. අර කවුද බොල…?”
වින්කලේ බයිසිකල් රෝදයක ඇද අරිමින් හිටි මාටින් ඇහුවා..
” ඇයි බං අර.. තැපැල් කන්තෝරුව ඉස්සරහ ලැටිස් ගහපු ගේ..”
” ඉතින්?”
” ඇයි බං ඊයෙත් පැච් එකක් දා ගෙන ගියේ..”
” අර හීරළුවගෙ ගෑණිද ඔය? අප්පට සිරි.. මට හිතයි පොඩි බාසාවක් දාල බලන්න”
” පවු පුරව ගන්නෙ නැතුව ඉඳින්”

හරියටම වෙලෝනා එක ළඟදි විල්සනුත් , කුසුමාවතිත් එකිනෙකා මුණ ගැසුනා.
” මට ගෙදර ඉන්න කම්මැලියි… ආ එක හොඳ මදිද ?”
” ඒකට කමක් නෑ.. ඒත් ගවුම නෑඳ..සාරියක් පටලගෙන ආව නම් හොඳයි..”
විල්සන් , කුසුමාවතී බාර් පොල්ලෙ හරහට තියා ගෙන බයිසිකළේ පැද්දා.

රෑ අටට , අට හමාරට විතර ඇති. රෑ කෑමෙන් පස්සෙ විල්සන් සිගරට් එකකුත් පත්තු කරන් කාමරේට ආවා.
පළඟැටියෙක් චිමිනි ලාම්පුව වටේ කැරකි කැරකි හිටියා.
” මේ මොකද මේ “?
” මේ ගවුම තමා අපේ පියවතී නැන්දා මට කිව්වෙ මගුල් දා රෑට අඳින්න කියල. කොහෙද ? නින්ද ගියානෙ…”
” සේරම පේනවනෙ ඇතුල..”
” ඉතී…………..න් ,,”?

විල්සන් සාක්කුවෙන් දිලිසෙන කොළයකින් දවටපු බුල්ටෝ වගේ එකක් අරන් කටේ දා ගත්තා.
” කෝ මටත් දෙන්න ”
” මේක පිරිමින්ට විතරයි”
කුසුමාවතී දවටනය උදුර ගෙන බැලුවා. තඩි මහත අයෝමය පුරුෂයෙක් මස් ගොබ පුම්බ ගෙන ඉන්න පින්තූරයක්. ” ලේගියම්”
” ඕක කෑවාම වැඩි වෙලාවක් ඉන්න පුළුවන්. අපෙ වැඩ පොළේ එක්කෙනෙක් කීවෙ.”
” එහෙනං දෙකක් විතර කන්න” කුසුමාවතී කිව්වා.

චිමිනිය අස්සට වැටුනු පළඟැටියා අඬු පඬු උඩ දා ගෙන මොහොතක් දඟලලා කරවී නිහඬ උනා.
විල්සන් දෙපතුල් එකට හප්පා පිස දා ගෙන ඇඳට ගොඩ උනා.

මේ පිරිමි ගෑනු මත්තෙ මෙච්චර මොකට නැහෙන්න හදනවද ? ගෑණුත් එහෙමයි. මට නොදැනෙන උන්ට දැනෙන අමුතු සැපක් ඕකෙ තියෙනවද? පන්තියෙ හිටපු පැහිච්චි කොල්ලො කෙල්ලො වල් කතා රහසින් රස කර කර කතා උනා. මොන රසයක්ද ?

පහුවදා උදේ පුරුදු පරිදි විල්සන් රස්සාවට ගියා. වැඩිපුර මූණ දුන්නෙ නැහැ කුසුමාවතීට. වැරැද්දක් කරල අහුවුන පොඩි එකෙක් වගේ විල්සන් හැසිරුනේ. පියවතී නැන්ද හරියට හරි. දහ දෙනෙක් ගත්තොත් දහ විදියයි.

” මේ ගෙට වෙලා ඉඳින්. ඔය ගවුම් කොටෙත් ගහගෙන පෙර ගමන් යන්න ඕන නෑ. ඌ එන වෙලාවක එයි. පිරිමියෙක් නේ…තව ටික දවසක් යන කොට ඔය කම්මැලි ගතිය ඇරිල යයි. නැන්දම්මා කීවා.

ලයනල්ල මොනව කරනවද දන්නෙ නෑ. විබාග ප්‍රතිපල ආවද ? රස්සාවකට ගියාද ? ඒත් මට මොනාටද ඒව? මං දැන් කසාද බැඳපු ගෑණියක්.

හදිසියෙන්ම දවසක් පෑලිසුයි , බේබි නෝනයි කුසුමාවතී බලන්න ආවා වැලිතලප වගයක් එහෙම හදා ගෙන.
” අනේ අම්මේ.. මං ටික දවසකට ගෙදර එන්නද ? එයා හොඳයි.. ඒත් මහ අමුතුයි.. මුල දවස්වල ටිකක් හොඳට හිටියා. මං වෙන පිරිමියෙක් දිහා බැලුවත් සැකයි.. කතා කළත් සැකයි…”
” උඹ ආවට කමක් නෑ. ටික දවසකට.. එත් එනවා නම් ඒ ළමයත් එක්කම වරෙං. නැත්තං කතා හැදෙයි උඹ දීගෙ ඇරිල ඇවිත් කියල”

නිල් පාට රුවල් නැවක පිංතූරයක් තියෙන සුදු පාට පළංගාන කුසුමාවතී අතින් බිඳී ගියා. ඒ හඬ අසා නැන්දම්මා කුස්සියට ආවා.
” හප්පොච්චියේ.. අවුරුදු දෙසීයක් පරණ පළංගාන. ඕක මට ලැබුණේ අපේ අම්මගෙන්. එයාට , එයාගෙ අම්ම දුන්නු එකක්”
” මේ සබන් වලට අත ලිස්සුව. මං හිතල කරපු එකක්යැ”
” එනකොට ගෙනාපුව නෙවෙයිනේ.. අනුන්ගෙ බඩු අත පත ගාන කොට ටිකක් පරෙස්සම් උනා නම් හොඳයි.” එහෙම ලොකු ඇණුම්පදේකුත් කියාගෙන..
” අත දම දම ඇවිල්ල මෙතන”… තව ලොකු දේකුත් කියා ගෙන නැන්දම්මා ගෙට ගියා.
” මට ඇහුණ ඔය අම්ම කියාපු එක.. දෑවැදි ගෙනාවෙ නෑ කියලද ඔය කියන්නේ..?”

” අපි දන්න අඳුනන මුදලාලි කෙනෙකුගෙන් හොඳ යෝජනාවක් ඇවිල්ල තිබුණේ.. හොඳ දෑවැද්දකුත් එක්ක එයා ගේ දුවට.. අර පියවතීගේ බල කිරීමට මේකට කැමති උනා මිසක්”
කුසුමාවතිත් කට පියා ගෙන හිටියේ නෑ..
” හපොයි.. දෑවැදිත් අරන් එන්න වටින මිනිහා…”
” ඇයි අපෙ එකාගෙ මොනවද අඩු පාඩු .. ඔය වගේ නිවිච්ච ගති ගුණ තියෙන එකෙක් මේ අහල ගං හතකවත් නැතුව ඇති”
” ගතිගුණ හොඳ වැඩියි.. ඒකයි තියෙන ප්‍රශ්නේ..”

කතාව තුනී වෙලා ගියා. තවත් දවසකට කොණක් ඉතිරි වෙන්න ඇරලා.

කුසුමාවතී වමණය කරනු අසා දුකට හා සන්තාපයට පත් නැන්දම්මා ඇයට කරුණාවෙන් කතා කළා.
” මට ටිකක් කේන්ති ගියා.. අර පළංගානට වෙච්චි දේ දැක්කම. සැට් එකෙන් එකක් අඩු උනා කියන්නේ ආයෙ ඒකෙන් වැඩක් නෑ”

” අර කතුරු මුරුංග ගහේ මල් පිපිල යමරෙට. මං එළඟිතෙල් ටිකක් දාල මලවල ගන්නං. රතු හාල් බතට හොඳයි”
කුසුමාවතීටත් හිතුනා තමා කතා කළ වේගය වැඩියි කියා.

” මං නාගෙන ඇවිත්ම කන්නම්”
නැන්දම්මා , තම ලේලිය දිය නාන අයුරු කුස්සියේ ජනේලයෙන් බලා හිටියා.

හවස නැන්දම්මා නිදා සිටි වෙලාවේ ලක ලෑස්ති උනු කුසුමාවතී ගාලු පාර දිගේ තම සැමියා එන පෙර මගට ඇවිද ගියා.

මස් කඩේ , පාරට පෙනෙන්නට අලුත්ද පරණද කියා හොයා ගන්න බැරි හරක් ගාත් කීපයක්ද එළු ගාත් කීපයක්ද එල්ලුනා.
බිම් තට්ටුවක් මත කඳ හරහා බාගෙට කපන ලද ඌරෙකුගේ ශරීරයක්ද විකුණන්ට තිබුණා. මස් කඩේට යාව තිබුණේ මාටින්ගේ වින්කලේ..

” ෂූ… ෂූ”
කුසුමාවතී නැවතුනා.
” ඇයි නංගී හුළං ගහන්නද ? පැච් එකක් දාගන්නද ?”
” මයෙ මොකේට හුළං ගහන්නද ? මං බැලුවේ මස් කඩේ කවුරුවත් ඉන්නවද කියල.”
” නෑ.. මං නිකමට ඇහුවෙ.. විල්සන් අයියත් හුළං ගහන්න එන හින්ද ”
” ඔය අයියා අපේ එක්කෙනා දන්නවද ?”
” නංගිට මස් ඕනද ? ඉන්ට මං අරන් දෙන්නම්. නංගි ගියොත් දෙයි කටු ගොඩක්”
” එපා.. එපා.. මට මස් එපා. අපෙ ගෙදරට මස් මාංස ගේන්නෙ නෑ”
” හරි හරි මට දැං තේරුනා. ඔය කාලෙට ඔහොම තමයි.. අපෙ ගෑණි තරං මස් උයන්න දන්න කෙනෙක් මේ කිට්ටුව පාතක නෑ. මං හදවල එවන්නම්. මොන මස්ද ? ඌරු මස්ද ? හරක් මස්ද ?”
” ඌරු මස්….” ” එක්කොත් එපා. විල්සන් අයියගෙ අම්ම දකී..”
” හරි හරී.. මං එවන්නංකො හොර පාරෙන්”

නැන්දම්මා විල්සන් සමඟ මොනවද කුටු කුටු ගෑවා. කුසුමාවතී දැක්ක. ඒත් ඇහුනෙ නෑ.
” ඈ පුතේ.. මගුල් ගෙදර තිබුණේ ගිය මාසෙ නේද ? අර තුන් මාසෙක විතර බඩක් කොහෙන්ද ?”

” අම්මේ.. අම්මලා තනි වෙන නිසා මං ගෙදර ආවා. අම්මලා කරදර කළ නිසා මං කසාද බැන්දා. අම්මලාම කෙනෙක් හොයල දුන්නා. දැන් නැති ප්‍රශ්න හදන්නෙ නැතුව ඉන්න.. එහෙම ප්‍රශ්නයක් නෑ…”
” ඕන එකක් – මයෙ මොකෝ”

************************************
“අර මාටින්ගෙ පවුලට කියල වල් ඌරු මස් උයවගෙන කාල තියෙන්නෙ.. මොන අසප්පුරුෂයෙක් ඉන්නවද දන්නෙ නෑ කුසේ”
” අම්මේ .. විහාරමහ දේවිට මී වදයක් කන්න ඕන උනේ.. පිලව් කී දෙනෙක් මැරෙන්න ඇද්ද ? මොකද මෙයා ඌරා මරා ගෙන කෑවද ?”

” මට ඌරු මස් හොදිත් එක්ක අමු රෝස් පාන් කන්න ආසාවක් ඇති උනා. හොදි විතරයි කෑවෙ. අර කෑලි ටික තාම ඇති පිඟානෙ වහලා”
” මං ගෙදර ඉඳිද්දි මස් මාළු කෑවා.. මෙයා මට කිව්වද මස් මාළු කන්න එපා කියල. කීව නං මං නොකා ඉන්නවනේ..”
” ඔය මාටින්ල ආස්සරේට හොඳ අය නෙවේ”

” ඌරු මස් තියා උම්බලකඩ කෑල්ලක්වත් ගෙනා ගෙදරක්ද මේක ?”

” මං ගෙදර ගිහින් ඉන්නද ටික දවසකට. මේ වමණෙ ටිකක් නතර වෙනකන්?”
*************************

කුසුමාවතී ගෙදර ගිහින් නැවැත්තුවා. විල්සන් සුමාන දෙකකට සැරයක් කුසුමාවතී බලන්න ගියා. කුස මේරුවා බලා ඉඳිද්දී වගේ.
විල්සන්ගේ කන්තෝරුවට ඔඩිට් එකෙන් පැන්නා. කවුදෝ පෙස්සමක් ගහල. බඩු වගයක් අඩුයි. සප්ලයි එකේ මහත්තයෙකුයි , විල්සනුයි වැඩ තහනමකට ලක් උනා. දැන් ඒකට නඩු. කම්කරු උසාවියේ. කොච්චර කලක් යයිද කියන්න බැහැ. විල්සනුත් කුසුමාවතීලගෙ ගෙදරට ආවා. කුසුමාවතිගේ අම්මයි තාත්තයි එහා කාමරේ. ජයසේන- කුසුමාවතීගෙ අයියට ආණ්ඩුවෙන් ඉඩම් හම්බුවෙලා පදිංචියට ගියා පදවියට.
*********************

කුසුමාවතීට දරුවා ලැබුණා. පුතෙක්. අම්මයි බබයි හොඳ සනීපෙන්. අම්මගෙ පාට. තාත්තගෙ නහය-කට. කුසුමාවතී සැනසුම් සුසුමක් හෙළුවා. යාළුවන් ගෙන් ගමේ අයගෙන් තෑගි බෝග ලැබුනා. ප්ලැනල් රෙදි කෑලි..බේබි සෝප්.. බේබි පුයර, ගෙදර හැමෝම පාවිච්චි කළේ බේබි සෝප්.
රණසිංහ මුහන්දිරමලාගේ විල්සන්. ඒ විල්සන්ගෙ සම්පූර්ණ නම. බබාට නමක් දාන්න අකුරු හදාගෙන ආවෙ විල්සන්ගෙ පැත්තෙන්.
විල්සන්ලගෙ සාලෙ එල්ලල තිබුණා එංගලන්තෙ රජ පවුලෙ පිංතූරයක්. ගෑණියක් වෙනුවෙන් ඔටුන්න අත හළ අටවන ජෝජ් මහ රජ්ජුරුවෝ තමයි විල්සන්ගෙ තාත්තගෙ වීරයා. විල්සන්ගෙ තාත්තට ඕන උනේ ඉන්ග්‍රීසි නමක් දාන්න.
කුසුමාවතීගෙ අම්මට – තාත්තට නම් ඔන්න ඔහෙ ඕන එකක්.
කුසුමාවතීට තමා අන්තිම තීරණය ගන්න පුළුවන් උනේ.
” සිරිමල්” ඒක හොඳයි. රණසිංහ මුහන්දිරමලාගෙ සිරිමල්.. එහෙම කියන කොට නිකම් මහ මිනිහෙක් වාගේ. අපි දාමු රණසිංහ මුහන්දිරමලාගේ සිරිමල් රණසිංහ කියල”
හැමෝම ඒකට කැමති උනා.

එක අම්ම කෙනෙක් රණසිංහ මුහන්දිරමලාගේ සිරිමල් රණසිංහ කොරහේ නාවල, නිල් පාට ප්ලැනල් රෙදි කෑල්ලකින් වතුර මාත්තු කරල අනෙක් අම්මා අතට දුන්නා.
ඒ අම්මා ගම්මිරිස් ඇට දෙකක් හපලා සිරිමල්ගේ පුරුෂ සංකේතයට හුස්මක් පිම්බා.
කුසුමාවතී සිරිමල්ගේ බෙල්ලටයි බඩටයි මලකින් බේබි පුයර ටිකක් දාල , තට්ටේට ඕඩි කොලොන් ටිකකුත් දාල විල්සන් අතට දුන්නා.
විල්සන් නුහුරට බබා වඩා ගත්තා.

( මතු සම්බන්ධයි )